Tūrokorokohia te pō, tākiri ko te ata
Ka whekī, ka whekā rā te rangi mata hau nō Tū
E tangi tīkapa ana te kanohi ora
Tēnei te takapau ō mate
kua hoki ki te ahuru mōwai
Ki te urunga te taka
Ki te moenga tē whakaarahia
Moe mai ki te ariki
Tēnei te tangi, tēnei te poroporoaki ki tēnei rangatira kua huri ki tua o te ārai.
E te rangatira e Lindsay Wehipeihana takoto mai rā ki te
takapou wharanui a te tini, a te mano
ki te huinga o te kahurangi, moe mai rā ki te atua.
Nō te tau 1993 ka whakamana i a koe mō ngā mahi i oti i a koe
mō Aotearoa Māori Tēnehi, ā, ka whakanuia koe hei mema mataora ki a AMTA.
E rere ana ngā whakaaro nui ki tō whānau e tangi nei ki a koe, ki ō piringa, ki ō hononga
Pai mārire. Kia piki te ora, te māramatanga ki a rātou i tō ngarohanga atu.
E kore koe e warewaretia, moe mai rā ki te ariki e te rangatira.
