Moe mai ki te pō uriuri, ki te pō tangotango, ki te pō i oti atu koutou
Haere ki ngā tini, ki ngā mano o te pō
Tūrokorokohia te pō takiri ko te ata.
Ka whekī, ka whekā te rangi matahau nō Tū
Nō Tū te winiwini, nō Tū te wanawana,
nō Tū whakaputaina ki te whai ao ki te ao mārama.
E tangi ana a Aotearoa Māori Tēnehi i te rironga o ēnei toki tokowha i ngā marama kua taha ake nei. He kaiārahi katoa mō ā rātou iwi, he pokohiwi kaha mō tō rātou iwi ki ngā kaupapa huhua, he whakatipuranga ki ngā tikanga a koro mā, ā, kui mā.
Kia Kahurangi te Koingo Tilly Reedy rāua ko tana hoa rangatira a Tā Tamati Muturangi Reedy, te whakatinanatanga o te whāriki atawhai ki ngā kaupapa katoa e hāngai ana ki te ao Māori tae atu ki te whakarauoratanga o te reo Māori.
Ki a Dinny Mohi nō Te Arawa waka me tana hoa whawhai i roto i ngā tau ki te papa whutupōro me te papa tēnehi anō hoki a Ronald Farrell nō Ngāti Porou. He toki te tokorua nei ki te ao whutupōro, te rīki me te tino kēmu i ngā tau tata, arā, ko te tēnehi tērā.
Haere ki tua o rehia ki te huinga o te tangata
ki te urunga tē taka, ki te moenga tē whakaarahia
E kore rawa e warewaretia ngā kōrero, ngā wā i nohotahi ki ngā kaupapa huhua o te motu, ngā tauira nā koutou anō i toha mai ki te ao Māori me ngā taonga i waiho mai mō te hunga e whai ana i ō koutou tapuwae.
Haere, haere, moe mai, whakangaro atu rā.
